كتبت: آية سلامة
في بداية الحوار، نُرحب بالكاتبة المتألقة رحمة الشاذلي صاحبة كتاب وحي القلم في لقاء خاص مع العهد نيوز.
- أهلا بيكي أستاذة رحمة. في البداية نحب أن تعرفينا عن من هي رحمة الشاذلي؟
= أنا اسمي رحمة الشاذلي، بحب الطموح جدًا، دخلت مجال الكتابة بالصدفة، بس كان تدبير ربنا أحسن من تدبيري، مؤمنة إن كل إنسان متخلقش وخلاص، لا الكل يسير لما خلق له وكل واحد فينا ليه مميزاته يركز عليها ويكبرها ويطورها عشان يقدر يسيب أثر.
- أستاذة رحمة عندك كام سنة؟ ومن أي مدينة؟
= عندي 22 سنة، من حدائق المعادي في القاهرة.
- هل بتعملي حاجة تاني غير الكتابة؟
= آه، أنا خريجة كلية تجارة وحاليا بعمل دراسات عُليا وبالنسبة للشغل بعمل كورسات Tot, Hr, soft skills.
- كيف اكتشفتي موهبتك في الكتابة؟
= كنت في وقت الأجازة في شهر أغسطس السنة إللي فاتت حسيت إني عندي معلومات وأقدر أكتب وبالصدفة لقيت كورس قريب مني كان ورشة كتابة للروايات مع الكاتبة بسمة الهواني ومسابتنيش حتى بعد الكورس، أي سؤال كانت معايا دايما ولما عملت الرواية وعجبت الناس لقيت نفسي مبسوطة وأنا بكتبها ساعتها عرفت وقولت لازم أكمل.
- ما هي أفضل الأساليب لديك في الكتابة؟
= أقدر اقول مثلًا التشويق، إن أنا بحب أقفل الفصل بنهاية تكون مشوقة، بحيث إن القارئ يفضل يقرأ وميبقاش الموضوع ممل معاه.
- ما هو فيلمك المفضل؟
= أفلام محمد هنيدي وأي حاجة كوميدية ماليش في الدراما.
- ما هي السِمات أو الصفات التي تتمني أن تمتلكيها؟
= يعني ماخدش الكلام على أعصابي، يعني أبقى باردة نوعًا ما، بلاش أي حساسية زايدة أو أي كلمة تضايقني.
- هل الكاتبة رحمة تحب أن تعمل بمفردها أم مع فريق؟
= مع فريق، يعني مثلًا أنا أكتب وواحد يسوّق، مش هينفع اشتغل لوحدي وكمان في ناس كتيرة بتساعدني ويعتبر هما سبب نجاحي بعد ربنا طبعًا.
- ما الإنجاز الذي تفتخرين به؟
= إن زي ما أنا بحب الأطفال وبحب المراجيح هتلاقيني شكلي في الحياة صغير مهما كان كبر سني هتلاقيني نفس الروح فهو يعتبر دا أكتر إنجاز بحبه أو أكتر حاجة بحبها حرفيًا.
- قدوتك في الحياة؟
= سيدنا محمد صلى الله عليه وسلم.
- كيف توفقين بين حياتك الأسرية والكتابة؟
= في وقت محدد للكتابة مبنحرفش عنه يعني مثلًا من 12 لـ1.
- هل واجهتك صعوبة في كتابة كتابك؟
= هو كان الموضوع عشان خاطر كان أول مرة فكانت بتواجهني أسئلة بس كانت أي حاجة المحاضرة بتاعتي إللي هيا الأستاذة بسمة الهواني بصراحة بتساعدني في أي حاجة وماسبتنيش، يعني حتى لما خلصت ورشة الكتابة بتاعتها كان أي سؤال على الواتس أي دار نشر بتبعتلي اللينك بتاعتها وتقولي شوفي دا لو ينفعك وهكذا.
- حدثينا عن روايتك؟
= هي رواية جمعت بين شخصيات كتيرة منهم الطيب، الطموح، الشرير، ومنهم إلي كان شرير تحت أثر ما وأهم ما يميز القصة بتاعتها وأنها مشوقة ودي اجتمع عليها كل القراء الحمد لله.
- كلمة تقوليها للكتاب إللي مفيش حد بيشجعهم؟
= اهتموا بشغلكم بس وطوروا في كتابتكم واشتغلوا مع فريق عشان لازم حد يسوق واجهزوا من نفسكم ولازم انت تكون حابب المكان إللي انت فيه.
- كلمة نختم بيها الحوار؟
= كل واحد يعمل إللي هو عايزه وشايفه صح ما دام الموضوع مش حرام بلاش نقيد الموضوع بالعادات والتقاليد عشان في حاجات كتير أوي عادات منقدرش نقول عليها سيئة بس إللي هيا مش دينية مش قرآن نمشي عليها فاعمل الحاجة إللي انت بتحبها وإللي انت عايزها بغض النظر عن نظرة المجتمع وما دام ربنا شاهد إنها مش حرام فاعملها.