القائمة الرئيسية

الصفحات

كيرلس بهجت للعهد نيوز "نفسي في يوم أبقا زي نجيب محفوظ"

 حوار: شان مسلم

كيرلس بهجت للعهد نيوز "نفسي في يوم أبقا زي نجيب محفوظ"

كيرلس بهجت طبيب جرّاح في مستشفى الدمرداش، ولكنه اشتهر بنوع آخر من الطب، فهو طبيب القلوب، حيث حقق شهرة ونجاح على السوشيال ميديا وحققت كتبه شهرة واسعة بين أوساط المجتمع المصري، وكان لنا معه الحوار التالي.


- لماذا طبيب القلوب؟


= أنا بكتب كلام ممكن يكون بيعجب الناس عشان هو صادق بالعكس نصه غلطات إملائية وأسلوب ركيك كأدب، لكنه كلام أنا بحسه، كلام مفيهوش تزويق، مفيهوش Fake يمكن الناس شبعت من الـ Fake شبعت من ال هو واحد بيدَّعي حاجة، الناس بتطلع بتحاول تعمل حاجة مش حقيقتها عشان لايك أو شير أو what ever، يعني أنا شخص مش فارقة معايا الكلام دا already أكل عيشي من الجراحة دكتور جرَّاح فبكتب بمزاجي، فبكتب ال أنا حاسه في قلة عجبها ال أنا بكتبه بس، وزي ما قلتلك الكلام دا لو حد حب يصنفه كأدب أو كـ كتابة أكاديمية لأ دا مالوش أي قيمة بس هي الميزة الوحيدة، إنه صادق وعشان فعلا حقيقي، ال أنا بحسه بطلعه مبعملش حاجة أكتر من كدا زيادة يعني.


- أقرب كتبك لقلبك؟


= كلهم صدقيني، مش جو ال هو إيه أقرب أفلامك لقلبك دا وزي ولادي بتاع نجوم السيما، بس فعلا كلهم، كل واحد منهم بقصة، يعني أنا الكتاب ال يخليني أعمله، تجربة أنا مريت بيها، سواء التجربة الفكرية، سواء اللامكترث، بيضة مان، الرفيق سيكو سيكو، الأخير بتاع المهزأ، دا أنا ذات نفسي مريت بتجربة زي كدا حسيت إن أنا شخصية مهزأة، فحسيت إن لأ الموضوع مبيمشيش كدا، الكتاب الأخير من أقرب الحاجات إلى قلبي عشان كتجربة مأثرة فيا جامد، بس فعلا كلهم، كل واحد منهم بقصة، كل واحد منهم بخبرة، كل واحد بشخصيات دخلت حياتي، بذكريات فـ كل حاجة منهم بحوار يعني.


- قصة كل كتاب؟


= صعب قوي، بس هو كل كتاب بيقول أكيد قصته، السيكو سيكو بيتكلم عن العلاقات والحب، مفهوم العلاقات الجنسية، مفهوم المشاعر، فكرة الشخص المتذبذب في العلاقة، فأكيد مريت بحاجة شبه دي، اللامكترث، شخص انعزالي بيوصل لمرحلة إن الدنيا متستحقش أي نوع من أنواع الاهتمام أصلًا، التجربة المحظورة، المفاهيم الدينية، كل كتاب ال يقرأه هيفهم تجربة ال كاتبه.. 


- أسماء الكتب مستفزة لـ فئة معينة؟


= ما هي بتستفز، وهو دا الهدف بتاعها، إنها تستفز، وتوجه لها نقد، وأكثر حاجة تضايقني الشخص السطحي، يعني الشخص السطحي دا بيوترني فاهمة قصدي، ال هو بياخد الكتاب من عنوانه، يعني مثلا ال يمسك كتاب زي التجربة الفكرية لروح أمه دا كتاب مفيهوش دا كتاب سطحي دا كتاب كذا، أنا معنديش مشكلة تقرأ الكتاب وتقول دا كتاب زي القرف، أنا معنديش مشكلة خالص، بالعكس بس اقرأه، متاخدش الموضوع من ع الوش وتبتدي تتعامل إن دا قناعة مطلقة عندك، بس هي المشكلة كدا إن احنا بناخد الموضوع من الوش ونبتدي نحكم حتى مع الأشخاص، حتى في علاقاتنا في كل حاجة، الموضوع من ع الوش، دا راجل بدقن دا إرهابي، دي بنت بشعرها دي بنت مش كويسة، اتنين ماشيين مع بعض راكبين في عربية في حتة ضلمة يبقى أكيد بيعملوا حاجة مش كويسة، ست بتعلي صوتها دي واحدة Vulgar، راجل راكب عربية شيك مثلا ولابس سلسلة دا واد توتو، احنا في حياتنا ججمنتر، فدا طبعا لمس الكتب بتاعتي، أو لمس الحاجات ال بكتبها يعني.


- بالنسبة لوقت إعداد الكتاب؟


= هو مفيش مقياس، وأنا وقتي كله مشغول فعلا في الطب والجراحة وكدا، ف فجأة تلاقيني سخنت على كتاب، وفي دماغي إني عايز أعمله، وفي حاجات ممكن أقعد بال 4 و 5 سنين اكتب فيها، ومخلصهاش، يعني عندي مشاريع كتير مفتوحة، كتب كتير مفتوحة لسه مقفلتهاش، مش عارف أقفلها فاهمة قصدي، وفي حاجات لا، يعني أنا عايز أقولك، المدخل لسيكولوجية الإنسان المهزأ دا مخدش مني شهرين تلاتة، اللامكترث أخد مني 3 سنين، فهي كدا، كل كتاب وحسب يعني.


حياتي عبارة عن Quotes


 لو تركزي تلاقي استايل الكتابة بتاعي في السوشيال ميديا استايل الكتابة بتاعي في الحاجات ال بكتبها ك كتب، الحياة بتاعتي عبارة عن Quotes، أنا عايش أصلا بفكرة إن انت لازم يكون عندك اقتباس، عارفة أما يقولك في موضوع التعبير حط اقتباسات، عشان تثري موضوع التعبير في العربي يعني، أنا مؤمن بكدا إن انت رأيك الشخصي دا حلو بس خليه لنفسك، فاهمة قصدي، يعني إن أنا اقعد أقول للناس رأي الشخصي مثلا، مش هفيدهم قد ما هقولهم انعكاس حاجة أنا لمستها في Quote، ف مفيش Quotes قريبة ليا لأن أنا حياتي كلها Quotes أصلًا. 


أنا معرفش ممكن أصنف كتابتي إيه، مقالة ولا قصة ولا أدب، إيه دا ولا إيه نوع الكتابة دا بس هي معتمدة بشكل أساسي على Quotes يعني، المقتطفات يعني.


- مؤخرًا في فئة معينة غريبة بتتابعك؟


= آه طبعا، بس هي بالنسبة لي ممكن تقولي من 17 ل 30 مثلًا. وآه طبعًا قدرت أوصل لها أعتقد، دي أكثر فئة أساسًا بتتباعني، ومؤخرًا ابتديت أحس إن في فئة غريبة بتتباعني، ال هي فئة الستات الكبيرة قوي، يعني بلاقي ستات 50 و 60 وستات مش رجالة كمان، وبيقولوا كلام تشجيع وكلام دعم، كلام يعني أنا بحترمه بشكل كبير جدًا، فا بصي مفيش برضو كاتب، يكون كاتب غبي بصراحة ال يتارجت حد، مش يتارجت فئة، أنت بتكتب عشان في مسج معينة في دماغك، توصل لزيد لعبيد، لخمسين سنة للسنتين لل 3، انت بتكتب بس محدش عارف في الآخر المعلومة بتوصل لمين، انت بتكتب البوست أو بتكتب الكتاب، أو المعلومة وفي الآخر صاحب نصيبها بيوصلها يعني، 

 

احنا مؤخرا بنقلب في الزبالة


بصي هو في مشاكل كتير جدًا في مجتمعنا، والموضوع مش موضوع نفسي قد ما موضوع اجتماعي، يعني احنا عندنا مشاكل اجتماعية بالزوف زي ما بيقولوا، الموضوع محتاج إدارة يكون عندها بُعد نظر، إدارة عارفة كدا مثلًا زي أما تتكلمي عن واحد زي غاندي مثلًا قدر إن يعمل نهضة في الهند لإن هو ابتدى يشتغل على العقليات، ووعي الشعب، ف انتِ محتاجة حد كدا، محتاجة حاجة تصلح المشاكل ال جوانا، بقالنا فترة مدفونين في أفكار غلط، وقناعات غلط، ومنطق غلط، وجهل، فالموضوع مش فلوس وأكل وشرب، بس، لأ في وعي، وعي نفسي وعي سلوكي ووعي روحاني حتى، الروحانيات دي ال بتغذي الروح بتغذي روحك مش بس بالدين، بتغذي روحك بالموسيقى بالفن، بالإبداع، الحاجات دي كلها، اتجردت جوانا ف بقينا جعانين، ف الشخص الجعان دا بيقلب في الزبالة، ف احنا مؤخرًا بنقلب في الزبالة. 


بنقلب في الزبالة في كل حاجة بقا، بتخش في علاقات غلط عشان تقلب في الزبالة، شغل غلط، قرارات غلط، يعني احنا محتاجين نتظبط على ليفيل أعلى من مجرد مباني وطوب، محتاجين نتظبط على ليفيل نفس وروح، ووعي وحاجات كبيرة قوي كدا.


- تفتكر إيه ال وصلنا إن احنا نبقى بالشكل دا؟


= من وجهة نظري أسباب كتير فعلًا، أسباب سياسية واقتصادية واجتماعية وفكرية وحاجات ليها علاقة بالمجتمع العالمي كله مش مصر بس، وفكرة عصر السرعة وفكرة إن الإنسان عمومًا بقا إنسان تافه، يعني زمان كان في إلى حد ما تُقل أو عمق في الشخصية دلوقت بقا في سوشيال ميديا ونتفليكس وكله بقا حاجات بتتكلم عن غريزة الإنسان، بتتكلم على فكرة الإيجو، الموضوع بقا معقد يعني مفيش سبب أقدر أقولك، هو أسباب كتير، الموضوع معقد يعني.


- إنك تكون حقيقي دي ميزة ولا عيب؟


= في كتاب اسمه اللامنتمي، لكولن ولسن، كاتب انجليزي، بيقولك إن ال بتتكلمي عليهم دول، فلنفترض مثلًا، احنا 100 شخص، 95% من الأشخاص مثلا عادي منتمين، وFake وسطحيين وكدا، في 5% لأ حقيقيين، ال5% دول 1% بس ال بيبقوا العظماء، ال 99% بقا بينهاروا وبينتحروا وبيحسوا بانهيار في القيم ومبيعرفوش يواكبوا، فكرة إن انت تكون حقيقي دي ميزة وعيب، عيب إن انت بتحس إنك مش قادر تواكب وفي نفس الوقت هي دي البداية بتاعت انطلاقة الشخصيات العظيمة، الشخصيات ال بتأثر في التاريخ، بيقولك دايمًا العظيم يا بيرفض زمنه، يا بيسبق زمنه، ف دا شخص عمل الاتنين، بس.


مقاومة الانتحار مش صعبة زي ما انت متخيل


 أصل هي مش مستاهلة، يعني أولًا بحس إن الشخص المنتحر دا مريض، يعني شخص تعبان بجد، بس يلعن أي حاجة يعني، مفيش حاجة في الحياة تستحق إن الإنسان يعمل في نفسه كدا، حقيقي مفيش حاجة تستحق إن الإنسان يعمل في نفسه كدا، انت عايش بتحاول تثبت نفسك، بشياكة بهدوء من غير توتر، مفيش حاجة تستحق إن انت تنهي حياتك عشانها بس، بس أنا عايز أقولك حاجة، أنا عن نفسي ك كيرلس سيبك من أي حاجة أنا جاتلي أفكار انتحارية قبل كدا، وحسيت إن مقاومتها صعبة، لو انت فعلا شخص بتتعرض لهجمات كتير، هجمات أسرة هجمات مجتمع، هجمات شخصية ذات نفسك، بس لو أنت قدرت تحس إن إنت إنسان قوي، إنسان عندك ثقة في نفسك حقيقية، إنسان عندك أمل، لأ الموضوع مش صعب زي ما أنت متخيل. أنا عارف طبعًا إن الموضوع نظري وأنا بتكلم بالمثل ال إيده في الميه مش زي ال إيده في النار. بس برضو أقولك إن الموضوع مش بعيد قوي زي ما الناس متخيلة. لأ في أمل وفي فرصة وفي طريق، بس.


كيرلس بهجت: كتبت بالمحاولة والخطأ


أنا شخص مدرستش، أنا شخص كتبت بال try and eror بالمحاولة والخطأ، يعني كتبت فالناس اديتني feedback ف أنا استمعت جيد لل feedback فابتديت أطور من نفسي، أنا للأسف مدرستش، ومش عارف دا ميزة ولا عيب، يمكن ميزة إن أنا تحررت من أي شكل من أشكال القوالب القديمة، وابتديت اكتب بطريقتي ال عبرت عني أنا، والعيب إن زي ما انت شايفه دا مش أسلوب كتابة حقيقي، يعني في ناس تقعد تتريق إيه الهبل ال انت كاتبه دا، مش هبل ك محتوى، هبل كطريقة كتابة ودي مشكلة إن الناس بتصنف إن أنا أديب وأنا مش أديب، ممكن قدام أطور أدرس أبقى حاجة كأديب فعلًا بس أنا مش أديب، أنا شخص مش دارس. 


كيرلس بهجت: احنا زي الكوبايات


تملي تفضي على ال حواليك طول ما انت بتدلدق ومبتملاش نفسك، عمرك ما هتعرف تدي، قراءة مستمرة بقا، تؤمن بقوة الإبداع، تغذي روحك، تسمع موسيقى، تمارس مش الدين ك طقوس تمارس الدين ك روحانيات، يعني يكون في علاقة مباشرة بينك وبين الله، الكلام دا كله روحك بتتغذى فبتعرف تطلع، بس طول ما أنت روحك جافة ناضبة مش هطلع أي حاجة حقيقية، أو مش هطلع حاجة حية بمعنى أصح يعني.


كيرلس بهجت: المهم الرسالة توصل

- هل تمانع تحويل كتبك لمحتوى صوتي؟


= لا خالص مبمانعش إن الكتب تتحول لصوتية أي حاجة أن شاء الله يحولوا لكتاب كرتون ولا فارقة معايا، أهم حاجة الرسالة توصل، يا ستي وصلي الكتاب بأي شكل، إن شاء الله بقولك توصليه ارسميه ع الحيطان مش فارقة معايا أهم حاجة المسج توصل.


كيرلس بهجت: نفسي في يوم أبقى زي نجيب محفوظ


أكتر كاتب بحبه عموما، بحب نجيب محفوظ بعشقه، ونفسي في يوم من الأيام أبقى زيه، مش عارف هبقى زيه ولا مش هبقى زيه، وباولو كويلو، وبحب ناس كتير بس دول أكتر اتنين، باولو كويلو كاتب برازيلي بتاع 11 دقيقة والخيميائي والجو دا، وأكتر واحد بحس إن هو شبهي في الكتابة د. أحمد لطفي السيد، هو مش شبهي بالاستايل بتاعي، بس هو أول واحد دخل الكتابة باللغة المصرية العامية مصر، وكان بيتكلم على فكرة الوعي عمومًا، فهما التلاتة دول، وبحب كل الناس بقا ك جديد ك قديم ك برا ك جوا، أي كاتب لازم يتم احترامه دا شخص عنده مسج فلازم توصل.


كلمة للقرًاء


أنا كل سنة بيكون عندي بروجكت بحب إن أنا اشتغل عليه، السنة دي كانت فكرة إن الإنسان يعرف يحط حدود أو يعرف يحط قيمة لنفسه ميكونش مهزأ، ميكونش شخص منساق، دي كانت المسج بتاعت 2021، لو في مسج أنا هبتدي بها في 2022 هيكون السطحية. إن احنا منكونش سطحيين منكونش تافهين، منكونش شخصيات هوائية، التفاهة بقت أوفر جدًا، والموضوع بقا في كل حتة، والموضوع بقا مقزز وبقينا بنتعامل بسطحية وفي سطحية ممكن تعديها لكن دي سطحية بتأذيك شخصيًا، بقيت تحس إن انت عايش في مجتمع عبارة عن كله مصطنع كله مش حقيقي كله عايز يعيش أدوار مش بتاعته، يعني لو هتكون مسج في كلمة كدا "كونوا حقيقيين".


- هل كيرلس بهجت هيشارك في معرض الكتاب 2022؟


= بالنسبة للمشاركة في معرض الكتاب مش هقدر أشارك بأي حاجة عشان مشغول برسالة الدكتوراه.

تعليقات